Satsaus saamelaisile ja kansalisten minoriteetiitten kulttuuriaktööriile

Satsaus anttaa maholisuuen ottaat vaarin kansanjoukkoin histooriasta ja kulttuuriperinöstä, mutta se kans auttaa kehittämhään uussii organisasuuniita, kompetanssii, verkostoi, pytinkkiitä ja mööttipaikkoi tulleevaisuutta varten. Ensimäinen hakemafristi oon 4. marsikuuta.

– Alkupöräiskansa ja kansaliset minoriteetit oon Norjassa histoorian aikana kokenheet – ja vieläki kokkeevat ette heitä systemaattisesti panhaan syrjhään ja heiltä vailuu hyväksyminen kansalisessa kulttuurielämässä. Met halluuma jatkossa eesauttaat paremin sitä ette alkupöräiskansan ja kansalisten minoriteetiitten maholisuuet dokumenteerata, toimiit ja eistäät heän kulttuurii ja taietta lujitethaan sannoo Sigmund Løvåsen, Kulttuuriraatin raatinjohtaaja.

Toimirahat oon jajettu kolmheen oorninkhiin:

• 2 miljuunaa kruunuu kulttuuriaktööriitten kehitystoimi-oorninkhiin
• 1 miljuuna pytingiitten ja infrastruktuurin ARENA -kuurto-oorninkhiin
• 1,5 miljuunaa kruunuu kulttuurisuoja-prosektikuurthoon

Tämän satsauksen alethiin vuona 2024, ja se jatkuu vuona 2025. Sen alethiin osana sitä ko Kultturiraati kuoraa Tottuuen- ja sovinonkommisuunin raporttii. Ekstra toimirahat oon ensimäiselä kerrala korvamerkitty poikittaishiin oorninkhiin ja kulttuurisuojhaan. Saamelaisen ja kansalisten minoriteetiitten taitheen ja kulttuurin lujittaminen oon yksi Kulttuuriraatin priorisoitu toimiala.

Kehittäminen, kompetansi ja verkosto

Kulttuuriaktööriitten kehitystoimet anttaavat kuurttoo verkkoin pykkäämisheen, kompetansin nostamisheen ja kulttuuriaktööriitten kehittämisheen. Mooli oon eesauttaat sitä ette taiet- ja kulttuurikentästä tullee moninainen, relevantti, tutkiiva ja kantamavoimainen.

Kulttuuriraatila oli samanlainen satsaus tässä oorningissa vuona 2024. Sen oli kohistettu aktööriile jokka oon saamelaiset, kväänit, norjansuomalaiset ja mettäsuomalaiset. 13 prosektii jokka eri laihiin eesauttaavat strategista ja taietfaakilista eistämistä, saivat kuurttoo. Prosektit olthiin monenlaiset, niin ko organisasuuniitten ja verkostoitten eistäminen, digitaalinen infrastruktuuri, uuen etableeraminen, talenttiprosektit, rekryteerinki ja kompetansin eistäminen. Sie saatat lukkeet enämen prosektiista täältä.

Hakemafristi: 4. marsikuuta kl 13:00.

Luje enämen kehitystoimista kulttuuriaktööriile täälä.

Raamit kulttuurin ympärillä

ARENA oon kuurto-oorninki kulttuuripytingiile ja infrastruktuuriile. Oorninki eesauttaa sitä ette areenat jokka oon meinattu prosektipohjaiselle taiet- ja kulttuurikentäle koko maassa, saattaavat kehittäät infrastruktuurii joka auttaa produksuunii, välittämistä ja faakilista eistymistä. Kuurttoo annethaan esimerkiksi uushiin pytinkhiin, uuesti pykkäämisheen ja siihen ette kehitethään jo olemassa olleevii paikkoi ja infrastuktuurii ja teknissii valmhiuksii. Sie saatat hakkeet kuurttoo etuprosekthiin, arkkitektikilppailhuun ja freistaamisprosekthiin. Mooli oon luoa areenat jokka kattoovat tulleevhaan ja oon elläävät, ja jokka näyttäävät ilmaisuitten moninaisuuen koko maassa.

Hakemafristi: 3. juunikuuta kl 13:00.

Luje enämen ARENA - kuurtorahaoorninigsta pytingiile ja infrastruktuuriile täälä.

Kulttuurisuoja: Dokumentasuuni, säilyttäminen ja esittäminen

Kulttuurisuojan prosektikuurto stimuleeraa työtä jossa kovothaan, dokumenteerathaan, otethaan vaarin ja välitethään etheenkäsin kulttuuriperinttöö. Moolina oon nostaat framile tiettoo histooriasta, taitheesta, kulttuuriista ja samfynninelämästä Norjassa tänä päivänä. Eriliikaisesti haluthaan kuurota toimii jokka ottaavat myötä usheita äänii, vahvistaavat moninaisuutta ja laajenttaavat kulttuurisuojaa.

Kulttuurisuoja peilaa kokemusten moninaisuutta ja laajuutta samfynnissä. Se oon tähelistä satsata prosektipohjaisesti siihen ette marginaliseeratuitten joukkoin ja ihmisten äänet ja kokemukset dokumenteerathaan, ja ette niistä otethaan vaarin. Se oon tähelistä kans jakkaat tiettoo heän elämän ehoista ja histoorioista etheenkäsin maholisiman monile. Vaphaat prosektikuurtorahat luovat engasementtii ja aktiviteettii kansalisesti, regiunaalisesti ja paikalisesti.

Nämät eriliikaiset kuurtorahat kulttuurisuojan prosektityöhön oon korvamerkitty saamelaisten, kansalisten minoriteetiitten ja toimintaesteisten kulttuuriperintöö ja histoorian dokumentasuunii, säilyttämistä ja tieon välittämistä varten.

Hakemafristit: 4. marsikuuta, 3. juunikuuta ja 2. septemperikuuta.

Luje enämen prosjektikuurosta kultturisuojale täälä.