Museumskonferansen 2024: Gode museer - betre lokalsamfunn

Meld deg på

Påmeldingsfristen er 17. oktober.

Dei  siste åras samfunnsendringar har vore dramatiske med pandemi, klimakrise og krigar. Korleis taklar me dei utfordringane Noreg og verda står ovanfor i dag, og korleis kan me, saman og kvar for oss, skape inkluderande fellesskap og lokalsamfunn? Sivilsamfunnet er sjølve kjernen i dette arbeidet, og kultur kan vere ei drivkraft som gjer endring mogleg. Internasjonale konvensjonar og deklarasjonar peikar på at dersom me skal lukkast, må me samarbeide både internasjonalt og nasjonalt. Føresetnaden for eit slikt samarbeid er ei sterk lokal forankring.  

Me treng levande lokalsamfunn tufta på aksept og tillit, og me treng sterke fellesskap som toler omstilling og  usemje. Kulturarvinstitusjonar, og i særleg grad musea, er heilt naudsynte i det lokale arbeidet og har samstundes viktige roller både nasjonalt og internasjonalt.  

Med internasjonale konvensjonar som rammeverk og med inspirasjon frå rørsla The Happy Museum, vil me i denne konferansen leggje til rette for diskusjon om kva roller musea kan ta i arbeidet for å skape ei betre framtid. Korleis kan sektoren bli ein enda tydelegare aktør i dette arbeidet? Me veit ikkje korleis framtida blir, men me kan påverke retninga og me må tenkje nytt. Korleis kan kulturarvsinstitusjonar bidra i arbeidet med å skape gode lokalsamfunn – også for generasjonane etter oss? 

Program

Komplett program lanserast etter sommaren, her er nokre utdrag frå programmet:

Hovudinnleiar for konferansen, Tony Butler, direktør ved Derby Museums Trust i England, vil gi oss ei innleiing om korleis musea kan bidra i arbeidet med å byggje gode og inkluderande lokalsamfunn. Med utgangspunkt i innlegget frå Tony Butler, vil Eva Johansen frå Alta museum reflektere rundt deira innsats for ei betre framtid. 

Vi vil deretter sjå nærare på korleis kulturmangfald og ulike fellesskap stimulerer til trygge og inkluderande byar. Korleis kan musea og andre kulturarvsinstitusjonar spele ei aktiv rolle i arbeidet med å byggje gode samfunn der det er rom for eit mangfald av praksisar og ytringar? 

Med utgangspunkt i musea si samfunnsrolle, løftar Hanna Schreiber, professor ved Warszawa Universitet, Polen, fram kva immateriell kulturarv har å seie for identitet og tilhøyrsle i storbyar som Warszawa og Krakow. Eit knippe museum i Noreg vil deretter diskutere kva utfordringar og moglegheiter musea ser i dette arbeidet.

Konferansen skal også diskutere i kva grad kulturarv er ein verdfull ressurs for turisme, utdanning, sysselsetjing og berekraft. Kulturturisme er ofte ein viktig del av lokale og regionale utviklingsstrategiar. Korleis responderer musea på dette arbeidet , og kva ser vi av aktuelle diskusjonar rundt berekraftig reiseliv i ulike lokalsamfunn? Hanne Lykkja, som har mastergrad i ressursgeografi og landskapsøkologi frå Universitet i Oslo, har jobba mykje med stadutvikling og besøksforvaltning i mange norske kommunar, innleiar. Deretter vil ulike aktørar diskutere relevante problemstillingar med utgangspunkt i sine lokalsamfunn.

Kvelden blir avslutta med middag og samrøre på Stormen.

Fredag 1. november startar professor Sturla Stålsett dagen med å reflektere rundt den avgjerande rolla kulturen har for å byggje inkluderande fellesskap og lokalsamfunn som toler usemje og omveltingar. Med dei store og komplekse samfunnsendringane dei siste åra, er denne rolla viktigare enn nokon gong. Innleiinga vil bli følgd av ei panelsamale om museas samfunnsrolle.

Konferansen vil også diskutere korleis musea arbeider for å vidareføre levande tradisjonar og kunnskap til neste generasjon. I tråd med konvensjonen om vern av den immaterielle kulturarven av 2003, løftar Meld. St. 23 (2020-2021), Ting, tillit og tid, musea i samfunnet, fram at tradisjonskunnskap knytt både til kultur- og naturarv er nyttig kunnskap for samtida. Samstundes blir det understreka at det er viktig å vidareføre slik kunnskap for framtida. Musea har ei sentral rolle i dette arbeidet, og tre museum vil dele erfaringar rundt korleis dei arbeider med å vidareføre tradisjonskunnskap til ungdom og unge vaksne.

Kunstnar Nina Vestby vil avslutte konferansen Med det nomadiske broderiprosjektet "EUTOPIA - where the heart matters" utforskar og samlar ho på historier om tilhøyrsler og identitet. Ho har samarbeidd med fleire museum og kulturinstitusjonar.

Innimellom programpostar vert det og høve til å møte internasjonal seksjon i Kulturdirektoratet/Kreativt Europa, samt andre seksjonar i Kulturdirektoratet som er til stades under konferansen.

Kontakt

Roger Johansen

Kulturarv og museum

roger.johansen@kulturdirektoratet.no

mobil: 911 35 001