Foreslå kandidatar til fagutval i Fond for lyd og bilete (2026–2028)
Styret i Fond for lyd og bilete skal hausten 2025 oppnemne nye fagutval for perioden 2026–2028. Vi inviterer både enkeltpersonar og organisasjonar i kunst- og kulturfeltet til å foreslå kandidatar til fondet sine fagutval for musikk, scene, film og marknadsføring.
Dei nye utvala vil behandle søknader frå og med januar 2026.
Om arbeidet i fagutvala
Utvala vurderer søknader ut frå kunstfagleg skjønn og brei kompetanse. Kvar søknad blir lesen av minst to medlemmar, og høgt prioriterte søknader blir behandla i plenum. Ved behov kan utvala få tilført spesialisert kompetanse gjennom fondet si nye konsulentordning.
Arbeidsmengda varierer mellom ordningane:
- Musikk, scene og film: to søknadsfristar i året, med utvalgsmøte som kan vare i inntil fem arbeidsdagar. Utvalsleiar bør rekne med om lag 200 timar årleg, medan andre medlemmar vil ha eit lågare timeomfang.
- Marknadsføring: fire søknadsfristar i året, med kortare møte (inntil to dagar). Medlemmane bør rekne med ca. 10 timar lesing per runde.
Utvalsmedlemmar blir honorerte etter statlege satsar.
Nye hovudordningar frå 2026
Frå 2026 samlar Fond for lyd og bilete dagens ti tilskotsordningar i fire. Endringa gjer det enklare å søkje tilskot til større prosjekt, og søkjarane slepp å sende fleire søknader for same prosjekt.
– Fond for lyd og bilete treng ei større omlegging for å sikre berekraftig forvaltning. Målet er å gjere søknadsprosessen enklare, meir oversiktleg og rettferdig, utan at det går på kostnad av fagleg kvalitet, seier Susanne Næss Nielsen, styreleiar i Fond for lyd og bilete.
Alle kunstformer som tidlegare fekk tilskot, vil framleis ha plass i dei fire ordningane.
Dette bør du ha klart før du fyller ut skjemaet
For å kunne vurdere kandidatane, ber vi om følgjande informasjon i nominasjonsskjemaet:
- Kva fagutval kandidaten blir føreslått til
- Namn, e-post, telefonnummer og bustadsadresse til kandidaten
- Kort skildring av fagleg bakgrunn og kompetanseområde
- Motivasjon eller grunngjeving for kvifor kandidaten bør sitje i utvalet
- Eventuelle verv i fagutval, styre eller komitear
Du kan foreslå deg sjølv eller andre. Dersom du nominerer fleire kandidatar til ulike utval, må det sendast inn eitt skjema per kandidat.
Frist og innsending
Frist for å sende inn forslag: 29. september 2025.